इस ब’रे श्री अमरनाथ जी दी यात्रा लेई पैह्ली अप्रैल थमां पंजीकरण शुरु होग

0
3630

इस ब’रे होने आह्ली श्री अमरनाथ जी दी यात्रा लेई औंदी पैह्ली अप्रैल थमां पंजीकरण दा कम्म शुरु होई जाग। बालटाल त चंदनवाड़ी आह्ले रस्तें राएं होने आह्ली इस जात्तरा गितै पंजीकरण मुल्ख भरै च पंजाब नेशनल बैंक, जम्मू-कश्मीर बैंक ते येस बैंक दिएं कुल 4 सौ 46एं शाखें दे राएं कीता जाग। आकाशवाणी दे जम्मू संवाददाता दी रिपोर्ट मुजब इस ब’रे एह् यात्रा 56एं दिनें दी होग जेह्ड़ी 28 जून थमां शुरु होइयै 22 अगस्त 2021 गी रक्खड़पुन्नेआ आह्ले दिन संपन्न होई जाग।

श्री अमरनाथजी श्राईन बोर्ड दे मुक्ख कार्यकारी अधिकारी नितीष्वर कुमार होरें दस्सेआ जे सरबंधत रिआसती सरकार यां केन्द्र शासित प्रदेषें दे प्रशासनें पास्सेआ मान्यता-हासल डाक्टरें ते मेडिकल इदारें पाससेआ दित्ते गेदे सर्टिफिकेट गै पंजीकृत बैंक शाखें च मंजूर कीते जाङन ते 15 मार्च 2021 दे मगरा जारी कीते गेदे सेह्त सरबंधी सर्टिफिकेटें गी गै वैध मन्नेआ जाग। यात्रा लेई पंजीकरण करोआने गितै यात्रिएं गी श्री अमरनाथ श्राईन बोर्ड दी वैबसाईट www.shriamarnathjishrine.com पर दित्ते गेदे निर्देषें दा पालन करना होग।

ध्यानजोग ऐ जे 13एं ब’रें शा घट्ट उम्री दे बच्चें ते 75एं ब’रें शा मती उम्री दे बुजुर्गें ते 6एं हफ्तें शा मते समें दे गर्भ आह्ली महिलाएं गी बी इस ब’रे यात्रा पर जाने दी इजाजत नेईं होग। हेलीकाप्टर राएं जात्तरा पर जाने आह्ले श्रद्धालुएं गी अगेत्रे पंजीकरण करोआने दी कोई लोड़ नेईं होग कीजे उंदी हेलीकाप्टर दिएं टिकटें गी गै पंजीकरण दे तौर उप्पर मन्नेआ जाग।

LEAVE A REPLY

Please enter your comment!
Please enter your name here