কেন্দ্ৰীয় চৰকাৰৰ বন্দৰ, জাহাজ আৰু জলপথ মন্ত্ৰী সৰ্বানন্দ সোণোৱালে কৈছে যে ৰাষ্ট্ৰীয় জলপথ এন ডব্লিউ-২ জৰিয়তে উত্তৰ-পূৰ্বাঞ্চলক কলকাতাৰ সৈতে সংযোগ কৰোৱা গুৱাহাটীৰ পাণ্ডু জাহাজ ঘাটলৈ এক্সিম আৰু আভ্যন্তৰীণ কাৰ্গো প্ৰেৰণৰ বাবে অতি শীঘ্ৰে কাম আৰম্ভ কৰা হ’ব। উত্তৰ-পূবৰ পৰা বিদেশ তথা দেশৰ অন্যান্য ৰাজ্যলৈ কাৰ্গোৰ সহজ আৰু ব্যয় সাধ্য চলাচলৰ বাবে এই বিকল্প পথৰ ব্যৱস্থা কৰা হৈছে বুলি বন্দৰ, জাহাজ আৰু জলপথ মন্ত্ৰ্যালয়ে প্ৰকাশ কৰিছে। মন্ত্ৰীগৰাকীয়ে এখন বৈঠকত কলকাতা আৰু হালদিয়া বন্দৰৰ বন্দৰ আৰু জাহাজ উদ্যোগৰ বিভিন্ন অংশীদাৰসকলৰ সৈতে বাৰ্তালাপ কৰে। তৈল বিভাগৰ ৰাজহুৱা খণ্ডৰ প্ৰতিষ্ঠান, ষ্টীল কোম্পানী, টাৰ্মিনেল অপাৰেটৰ আদিকে ধৰি শ্যাম প্ৰসাদ মুখাৰ্জী বন্দৰৰ ভূমি ব্যৱহাৰকাৰীসকলে বৈঠকত অংশগ্ৰহণ কৰে। শ্ৰীসোণোৱালে কলকাতা বন্দৰৰ জৰিয়তে সাগৰ আৰু নদীপথৰ সংযোগ ঘটা এন ডব্লিউ-ৱান আৰু এন ডব্লিউ-টু জলপথ ব্যৱহাৰ কৰাৰ এই অনন্য সুযোগৰ অংশীদাৰ হ’বলৈ সকলোকে আহ্বান জনায়।
