वनमंत्री संजय राठोड यांच्यावर पूजा चव्हाण मृत्यू प्रकरणी होत असलेले आरोप त्यांनी फेटाळून लावले. त्यांनी आज पोहरादेवी इथं भेट देऊन धर्म पिठाचं दर्शन घेतलं त्यानंतर ते बातमीदारांशी बोलत होते.

पूजा चव्हाणचा मृत्यू दुर्दैवी असून चव्हाण कुटुंबीयांच्या दु:खात आपण सहभागी असल्याचं त्यांनी सांगितलं. पूजा चव्हाण मृत्यूवरून विरोधक घाणेरडं राजकारण करत आहेत, माझ्यावरचे आरोप चुकीचे आणि निराधार आहेत, असं ते म्हणाले.

मुख्यमंत्र्यांनी या प्रकरणाची चौकशी लावली आहे. चौकशीत सर्व गोष्टी स्पष्ट होतील आणि पोलीस तपासातून सत्य बाहेर येईल. माझं राजकीय आणि कौटुंबिक आयुष्य उद्ध्वस्थ करण्याचा प्रयत्न करू नका, असं आवाहन त्यांनी केलं.

तर, राठोड सत्य लपवण्याचा प्रयत्न करत आहेत, असा आरोप विधान परिषदेतले विरोधी पक्ष नेते प्रवीण दरेकर यांनी केला आहे.