कोरोना अद्याप गेलेला नाही, पण तरीही अनेक लोकांनी मास्क लावणं सोडून दिलं आहे, हे बेजबाबदार सामाजिक वर्तन चिंताजनक आहे, असं राज्यपाल भगतसिंह कोश्यारी यांनी म्हटलं आहे.

ते आज राजभवनात साप्ताहिक धगधगती मुंबईच्या ११ व्या वर्धापन दिनानिमित्त धारावीला करोनामुक्त करणाऱ्या ३० कोरोना योद्ध्यांचा सत्कार करताना बोलत होते. कोरोनाबाबत सतर्कता, जागरुकता आणि नियमांचं सर्वांनी पालन करणं हीच खरी समाजसेवा ठरेल, असं ते म्हणाले.

यावेळी राज्यपालांच्या हस्ते खासदार राहुल शेवाळे, नगरसेवक वसंत नकाशे आणि हर्षला आशिष मोरे, मुंबई महानगरपालिकेचे सहायक आयुक्त किरण दिघावकर, सहायक पोलीस आयुक्त रमेश नागरे, आरोग्य अधिकारी डॉ विरेंद्र मोहिते, इंडियन मेडिकल असोसिएशनचे उपाध्यक्ष डॉ. अनिल पाचणेकर, लावणी कलावंत महासंघाचे अध्यक्ष संतोष लिंबोरे आणि धगधगती मुंबईचे संपादक भीमराव धुळप यांसह ३० कोरोना योद्ध्यांचा सत्कार करण्यात आला.