लॉकडाऊनमध्ये खरीपातली शेतीची कामं सुरळीत व्हावीत यासाठी कृषि विभागातल्या अधिकारी-कर्मचाऱ्यांनी प्रयत्न करावेत, असं आवाहन कृषिमंत्री दादाजी भुसे यांनी केलं आहे. ते आज खरीप हंगामाच्या तयारीचा आढावा घेताना बोलत होते. 

राज्यात खरीपाचं क्षेत्र १४० लाख हेक्टर असून १६ लाख १५ हजार क्विंटल बियाण्यांची आवश्यकता आहे. महाबीज, राष्ट्रीय बियाणे महामंडळ आणि खासगी उत्पादक यांच्या माध्यमातून १७ लाख २७ हजार क्विंटल बियाणे उपलब्ध आहे, असं या बैठकीत सांगण्यात आलं. राज्यात तृणधान्य लागवड ३६ लाख २ हजार हेक्टर, कडधान्य २० लाख २५ हजार हेक्टर, तर ४२ लाख ८४ हजार हेक्टर क्षेत्रावर तेलबिया लागवडीचे नियोजन केलं आहे. कापसासाठी बियाण्यांच्या १ कोटी ७० लाख पाकिटांची गरज असून बियाणे उत्पादक कंपन्यांनी २ कोटी ७२ लाख पाकिटाच्या पुरवठ्याचं नियोजन केलं आहे.

खरीप हंगामाच्या दृष्टीनं सर्व कृषी सेवा केंद्रं तसंच कृषी अवजारांची विक्री आणि दुरुस्ती करणारी दुकानं पूर्ण वेळ चालू राहतील, तसंच या दुकानांवर गर्दी होणार नाही याची दक्षता घ्यावी, असं कृषिमंत्र्यांनी सांगितलं.