नोवेल कोरोना या विषाणूचा भारतात संसर्ग होऊ नये यासाठी खबरदारीची उपाययोजना म्हणून आतापर्यंत ९६ विमानांमधून आलेल्या २० हजार ८४४ प्रवाशांची तपासणी केली असल्याची माहिती केंद्रीय आरोग्य मंत्रालयानं दिली आहे. भारतातल्या कोणालाही या विषाणूचा संसर्ग झालेला नाही, मात्र तीन संशयित रुग्णांना देखरेखीखाली ठेवलं आहे, अशी माहिती आरोग्य मंत्रालयानं दिली आहे.

या विषाणुचा प्रसार रोखण्याच्या दृष्टीनं प्रवासासाठी जारी केलेली मार्गदर्शक सूचना आता बारा विमानतळांना लागू केली असल्याचंही आरोग्य मंत्रालयानं म्हटलं आहे.

कोरोना विषाणूंचे नमुने तपासण्यासाठी महाराष्ट्रात पुणे येथे असलेली राष्ट्रीय संसर्गजन्य रोग संशोधन संस्था सज्ज आहे, तसंच आवश्यकता असेल तर, देशातल्या आणखी दहा तपासणी केंद्रांमध्ये या विषाणूंचे नमुने तपासले जातील असंही आरोग्य मंत्रालयानं म्हटलं आहे.