অসমৰ আবকাৰী বিভাগে কোৱিড-১৯ৰ সময়ছোৱাত ১০ লাখ লিটাৰ হেণ্ড ছেনিটাইজাৰ উৎপাদন কৰিছে। গুৱাহাটীত সাংবাদিকৰ সৈতে হোৱা কথা-বতৰাত ৰাজ্যখনৰ আবকাৰী, মীন পালন আৰু বনমন্ত্ৰী পৰিমল শুক্লবৈদ্যই কয় যে, বিভাগৰ অধীনত বিভিন্ন গোটে স্থানীয়ভাৱে হেণ্ড ছেনিটাইজাৰ উৎপাদন কৰিবলৈ লৈছে। তেওঁ কয় যে, ৰাজ্যখনক মাছ উৎপাদনৰ ক্ষেত্ৰত আত্মনিৰ্ভৰ কৰি তোলাৰ উদ্দেশ্যে মীন বিভাগে ভালেমান পদক্ষেপ হাতত লৈছে। বিগত ৫ বছৰত থলুৱা মাছৰ উৎপাদন ২০ শতাংশ বৃদ্ধি পোৱা বুলি মন্ত্ৰীগৰাকীয়ে উল্লেখ কৰে। তেওঁ কয় যে, ৰাজ্যখনত সম্প্ৰতি ২০১৬ চনৰ ২.৯৪ লাখ মেট্ৰিকটনৰ বিপৰীতে ৩.৭৩ লাখ মেট্ৰিকটন থলুৱা মাছ উৎপাদন হয়। অসমে বৰ্তমান উত্তৰ পূৰ্বাঞ্চলৰ আন ৰাজ্যসমূহলৈ মাছ ৰপ্তানি কৰিবলৈ লৈছে বুলি শ্ৰীশুক্লবৈদ্যই প্ৰকাশ কৰে।