প্ৰধানমন্ত্ৰী নৰেন্দ্ৰ মোদীয়ে কৈছে যে, চৰকাৰে কোৱিড-১৯ সৃষ্ট পৰিস্থিতিৰ মাজতে অতি কম সময়ৰ ভিতৰত শক্তিশালী স্বাস্থ্য আন্তঃগাঁথনি গঢ়ি তুলিছে। তেওঁ কয় যে, চৰকাৰী আৰু ব্যক্তিগত খণ্ড সমন্বিত প্ৰচেষ্টাৰে কোৱিড-১৯ৰ নমুনা পৰীক্ষাৰ বাবে পৰীক্ষাগাৰৰ বিশাল নেটৱৰ্ক স্থাপন কৰা হৈছে আৰু কৰোনা ভাইৰাছৰ নিয়ন্ত্ৰণত ই সহায় কৰিছে। প্ৰধানমন্ত্ৰীয়ে আজি স্বাস্থ্য সম্পৰ্কীয় এখন ৱেবিনাৰত ভাষণ দি এইদৰে প্ৰকাশ কৰে। প্ৰধানমন্ত্ৰীয়ে কয় যে, এইবাৰৰ কেন্দ্ৰীয় বাজেটত স্বাস্থ্য খণ্ডৰ বাবে অভূতপূৰ্ব পৰিমাণৰ ধন আৱণ্টন দিয়া হৈছে আৰু ইয়াৰ পৰা চৰকাৰ যে, দেশৰ প্ৰতিজন লোককে উন্নত স্বাস্থ্য সেৱা প্ৰদান কৰিবলৈ প্ৰতিশ্ৰুতিবদ্ধ সেয়া প্ৰমাণিত হৈছে। তেওঁ কয় যে, ভৱিষ্যতে কোৱিড-১৯ৰ লেখীয়া স্বাস্থ্য বিপৰ্যয়সমূহৰ ফলপ্ৰসূভাৱে সন্মুখীন হোৱাৰ বাবে স্বাস্থ্য খণ্ডৰ আন্তঃগাঁথনি সুদৃঢ় কৰাটো অত্যন্ত জৰুৰী। চৰকাৰে স্বাস্থ্যজনিত বিষয়সমূহৰ ক্ষেত্ৰত এটা সৰ্বাত্মক আৰু সংহত দৃষ্টিভংগী গ্ৰহণ কৰিছে বুলি প্ৰধানমন্ত্ৰীয়ে উল্লেখ কৰে। তেওঁ কয় যে, চৰকাৰে স্থায়ী আৰু ব্যৱহাৰকাৰীৰ বাবে অনুকূল বুলি পৰিচিত প্ৰযুক্তিৰ সহায়েৰে দেশৰ দুৰ্গম এলেকাসমূহত শক্তিশালী স্বাস্থ্য আন্তঃগাঁথনি গঢ়ি তোলাত গুৰুত্ব আৰোপ কৰিছে। তেওঁ লগতে কয় যে, ভাৰতে সমন্বিত প্ৰচেষ্টাৰে ভালেসংখ্যক লোকৰ জীৱন ৰক্ষা কৰিছে আৰু এতিয়া ভৱিষ্যতৰ বিপৰ্যয়ৰ বাবে নিজকে সাজু কৰি তোলাৰ লক্ষ্য নিৰ্ধাৰণ কৰা হৈছে।